التدوين دليل وجودك في الحياة

صدفة .. الحلقة الخامسة

28

صدفة … الحلقة الخامسة 

 يدخل سامي بيته وينادي عنود يا عنوووود فينك 

عنود من فوق ترد وهيا واقفة على السلم هلا بابا 

سامي : تعالي هنا ابغاكي بسرعة

العنود : طيب بابا .. نازلة 

سامي : دوبي كنت في المصنع وشفت كل شي بعيني و اتأكدت معلوماتي الي كنت شاكك فيها

العنود : خير يا أبوية ايش في ؟ 

سامي : الوضع مرة ملخبط ومافي احد بيداوم في المصنع 

اخذت معايا عامر واكتشفت انه ادمي فاهم وخليته يشتغل معانا من بكرة 

العنود: عامر مين ؟؟ هذا ايش عرفه في المصنع والادارة ؟ 

سامي : عامر خريج ادارة اعمال ومشروع التخرج حقه شي محترم 

وبعدين يابنتي اعتمدنا على غيره ومافلحو .. خلينا نجربه

العنود : نجرب تاني !!! الي تشوفه يابابا اهم شي المصنع يرجع زي زمان ويتحسن خاصة انه حنسافر على امريكا وحتكون معايا بابا .. ومافي احد على راسهم  

سامي : خير ان شاءلله 


*******

في بيت عامر 

عامر : كم مرة يا امي قلت لك لا تحرجيني مع خالتي وهديل 

نحن اقارب واتربينا سوا وبعدين الزواج انا مأجله

خلينا نشوف حل لمشكلة ابوهم ؟

ام عامر : ياولدي انا اتمنالك الخير وانت في النهاية ادرى بمصلحتك ومشكلة زوج اختي ربنا قادر عليه 

اهم شي صحة اختي وما يضرها بعد العمر والعشرة دي ماتستاهل دا كلو

عامر : ان شاءلله مايضرها ،،

المهم ابغى اقلك ان الرجال الي انا شغال معاه خلاني اشتغل معاه في المصنع وقال عجبتني فكرة مشروع التخرج 

ويبغى يطبقها في المصنع 

ام عامر :ماشاءالله الحمدلله .. الله يوفقك ويباركلك في عملك تستاهل كل خير اهم شي كم حيعطيك راتب كويس ؟

عامر : ما اتفقنا على فلوس ولا على المنصب بس قال تعال بكرة ونتفاهم 

****************

في بيت هديل ام هديل متضايقة وزعلانة وتشتكي لبنتها الكبيرة هديل :

ياهديل يابنتي انتي ماشاءالله اتوظفتي وخلاص مسكتي طريقك

باقي اخوانك الاثنين هزار وهيفاء يتخرجوا من الثانوية ويبدأوا حياتهم وشغلهم زيك 

هديل : يا ماما لا تشيلي هم كلو يتسهل انتي اهم شي انتبهي على صحتك 

يلا انا استأذن رايحة الدوام .. 

************

في مكتب المصنع الصغير قزاز شفاف مُطل على المكاين والعمال واقفين 

عامر وسامي مع مشعل مشرف العاملين في المصنع 

سامي : شوف يا مشعل انا عينت عامر مدير المصنع وطردت اللبناني وياريت تبلغ كل الموظفين انو في اجتماع مهم اليوم عشان التغييرات الجذرية الي حتسير في المصنع ونطبق مشروع عامر الجديد انا مرة متفائل بيه..

مشعل:ان شاءالله ياعمي 

تقدر تخرج الان تكمل شغلك ..

مشعل يخرج من المكتب 

سامي : شوف يا عامر .. ربنا سخرك ليا عشان تكون معايا وانت حتكون عيني في هذا المصنع 

و بيني وبينك حسافر لامريكا خلال الايام الجية مع العنود بنتي 

اقعد معاها كم شهر عشان شروط البعثة كدا 

وراح نتواصل ان شاءالله مع بعض بالتلفون او الفيس تايم اتطمن عالأوضاع وان شاءالله اسمع اخبار حلوة

عامر : والله يا عم سامي هذه مسؤولية جدا كبيرة .. مني عارف ايش اقولك انت حطيت ثقتك كلها فيا وما ابغى اخذلك .. بس المشكلة اني مرتبط بعقد مع صاحب مكتب السيارات !!

سامي : ان شاءلله انت قدها .. والراتب زي ماوعدتك ضعف الي تاخذه وانا بنفسي راح ابلغه انك صرت معايا 

بس على الاقل الين توصلنا المطار 🙂 ضحك الجميع وخرجوا من المصنع 

في السيارة اتصلت العنود على سامي 

العنود : يابابا فينك اتاخرت الساعة ١:٣٠ والبنك يقفل ٢ يادوب اروح استلم البطاقة ؟

سامي : في الطريق يابنتي راجعين خليكي جاهزة 

وصل عامر وسامي البيت نزل سامي البيت وكانت العنود تنتظرهم في الشارع  

سامي : خلاص عامر حيوصلك انا طالع البيت أريح شوية 

العنود : طيب .. باي

********** 

في السيارة هدوء وصوت اذاعة بانوراما اف ام خلفية مذيع يتكلم عن موضوع السعادة

وهل صحيح ربطها بالسفر والمال 

العنود : ايش رايك انت يا عامر صح كلام المذيع ؟

عامر بكل هدوء : انا ماقد سافرت عشان اعرف لو حكون مبسوط ولا لأ ؟ 

العنود حست بالذنب على السؤال وحبت تغير الموضوع وسألته 

كيف المصنع بابا يقول خلاص اتوظفت فيه ماشاءلله 

عامر : ايوة الحمدلله ان شاءلله اكون قد المسؤولية 

العنود : ان شاءالله 

على فكرة البنك الي رايحين له فيه وحدة مرة ساعدتني ومؤدبة ان شاءلله تكون موجودة اليوم 

************

وصلوا البنك نزلت العنود والامن مقفل الباب وينتظر الزباين تخرج ومانع الدخول 

العنود : لو سمحت انا بس حستلم بطاقتي وخارجة 

حارس الامن : للاسف ممنوع دخول اي مراجع هذي تعليمات 

عامر يشوفها واقفة مع الامن ينزل من السيارة ويروحلهم 

عامر : خير في شي يا عنود ؟!

العنود : يقولك قفلوا خلاص وانا بس ابغى استلم البطاقة 

يخرجوا موظفتين ويقولوا للامن خلاص كذا مافي احد تقدر تقفل .. فجاة الموظفة تقول عامر !! 

عامر مايعرف مين الي نادته الاثنين منقبات 

منقبة ١ : عامر انا هديل ايش جابك هنا ؟ ومين هدي ؟ 

عامر : اهلين هديل هدي العنود بنت العم سامي الي اشتغل معاه ؟

هديل بعد ما تشمق تقول : ايوة افتكرها جاتني الاسبوع الماضي اهلين عنود :/

العنود : مرحبا ما كنت اتوقع انك تعرفي عامر 

انا جاية استلم البطاقة بس .. لاني مسافرة امريكا وماعندي وقت 

هديل : عشانك جاية من طرف عامر راح اعطيكي هيا

تلف هديل على رجل الامن وتقوله دقيقة انا نسيت شي 

تدخل هديل تجيب البطاقة وتخرج 

اتفضلي هذي بطاقتك بالسلامة فرصة سعيدة .. تقولها من تحت ضرسها :/ 

منقبة ٢ : هديل هذا عامر ولد خالتك ؟؟ مين هذي الي معاه كاشفة شعرها كذا ؟؟ 

عامر والعنود سمعوهم ورجعوا ركبوا السيارة 

العنود : شكرا ياعامر من غيرك ما كنت حستلم البطاقة 

بس لايكون سببتلك احراج ؟؟

عامر : العفو مافي احراج ولاشي ..

هدوء في السيارة 

يرن جوال عامر في السيارة نغمة رسالة نصية من هديل !!

انتهت الحلقة الخامسة 

Leave A Reply

Your email address will not be published.