التدوين دليل وجودك في الحياة

صدفة .. الحلقة الرابعة

98

صدفة .. الحلقة الرابعة

هديل رجعت بيتها بعد العمل دقت الجرس وفتح لها عامر الباب
استغربت وقالت : عامر !!
عامر : أهلًا هديل .. اتفضلي
هديل : اشبك يا امي ،!! كيفك ياخالتي .. اشبها امي
ام عامر : مافيها شي .. بس مصدعة شوية
هديل : يا امي قولي اشبك .. ليش خالتي وعامر جو .. بابا سوالك شيء ؟؟ فين بابا أصلا ؟؟
عامر : ابوكي اتضارب مع أمك وخرج من البيت بعفشه
لازم تساعدي أمك وتوقفي جنبها يا هديل الفترة القادمة وتراعي صحتها
هديل : يا ربي ..بصوت حزين.. ربي ماراح ينسانا يا أمي وانا واخواني راح نوقف جنبك
ام عامر : وكمان انا وعامر نوقف جنبكم لا تشيلو هم أبدا ً
أم هديل : الله ييسر الأمور ويكتب الي فيه خير

عامر وسط حديثهم يسرح بالتفكير العميق ويفكر في كلام أمه عن هديل
وهل هي ممكن تكون زوجة المستقبل ؟ وهل يعطي نفسه فرصة يتعرف عليها قبل لا يقرر ؟؟
تقاطع حبل أفكاره أمه وتنادي عليه : ياعامر ياعامر ..!!
جوالك بيرن شوف مين ؟
عامر : ألو .. هلا عّم سامي أوكي جايك الان
هذا الرجال الي اشتغل معاه اتصل انا لازم امشي .. سلام

**********
في السيارة سامي مع عامر يقوله أبغى اروح المصنع بسويلهم زيارة مفاجاة وأشوف كيف الشغل ماشي
عامر بهدوء كالمعتاد : حاضر يا عمي
سامي : قولي ياعامر .. ايش كان مشروع تخرجك في الجامعة ..
عامر : كانت فكرة مشروعي يتكلم عن كيفية ادارة مشاريع المقاولات بالتكنولوجيا
سامي: ماشاءالله كيف يعني اشرحلي اكثر
عامر: يعني عمل المقاولات دائما ادارته التسويقية تكون بالطريقه القديمة
وانا حبيت أضيف له تقنية التسويق عبر الانترنت ، و كيف نضيف علم الادارة بالتكنولوجيا و كمان من خلاله نعرف ونقدر نراقب أداء الموظفين .. الحمدلله أخذت فيه درجة كويسة
سامي : ماشاءلله .. هذي دراسة جديدة شكلها .. وريني هيا بعدين
***********
بيت ام هديل في الصالة تجيب هديل الموية لامها
وتقولها اهم شي صحتك لا تفكري فينا خلاص نحن صرنا كبار
هديل تسأل خالتها ام عامر : كيفك يا خالة وكيف عامر ؟؟ ايش صار يشتغل ؟؟
ام عامر : الحمدلله طيبين .. ما قال ولا شي بس الي اعرفه انه في المكتب مع ناس
يقول عنهم ناس طيبة
هديل : الله يوفقه
ام عامر : نحن حنسافر مع بعض وانا كلمت أمك انك تجي معانا
هديل باستغراب : أجي معاكم !! فين وكيف وليش ؟؟
ام عامر : تعالي معانا نسافر ونغير جو شوية انا احتاج احد معايا وأمك ماهي راضية تجي وتسيب الأولاد
هديل : خلاص يا امي إنتي سافري معاهم وانا أنتبه على اخواني
ام هديل : لا يابنتي روحي إنتي معاهم بس شوفي كيف جدولك في الشغل اذا تقدري او لأ ؟
هديل : طيب حشوف كيف

*******
في المصنع المتوسط الحجم والاثاث المتواضع وبعض عشش العنكبوت في السقف
دخل سامي يقول لعامر : كالعادة مايهتموا في النظافة ..
أحد العمال الشباب ماشي في الممر وشاف سامي : مرحبا كيف اقدر أخدمك .؟
سامي : أدور على مدير المصنع او مشرف الفترة الحالية
العامل : الى الان ما جا احد لو حاب تنتظر في مكتبه اتفضل هناك
سامي : اها .. ماجا احد .. طَيب تسلم .. بس كنت بسالك كيف الشغل في المصنع شغال وكيف الطلبيات ؟؟
العامل : الوضع عادي زي قبل ٦ شهور مافي جديد وعدونا بتطوير في المصنع لكن ماصار شي
وكل ما نسأل مدير المصنع فين صاحب المصنع يقولوا مسافر برة او مشغول ..
سامي : غريبة مع أني ماسافرت من سنة تقريبا
العامل مصدوم : هوا انت صاحب المصنع ؟
سامي : بضحكة خفيفة مقهورة ايوة يا ولدي .. انا سامي مد يده وسلم عليه
العامل : اهلًا عّم سامي انا مشعل يعني اخيراً شفنا العم سامي نسمع عنك بس ما نشوفك ..
سامي : قولي يا مشعل ايش قصة المصنع معقولة ماصار شيء جديد
مشعل : على حطة يدك من يوم ما جيت ماشفت شي اتغير !!
سامي : لاحول ولاقوة الا بالله .. تعال وريني المصنع وخليني اشوف المكاين والآلات
مشعل : اتفضل ياعمي أكيد
*********
بعد ساعة ونص خلصت الجولة وسامي متذمر جدا الى الان ما جا احد من الموظفين والاداريين
مجرد عمال يشغلوا الأجهزة ويراقبوا خط السير
وصلوا عند المكتب داخل المصنع جلسوا فيه سامي وعامر
مشعل : استريحو هنا على بال اجبلكم شي تشربوه .. وخرج مشعل من المكتب
سامي : عشان تعرف ربنا يسخرلك اولاد الحلال وشباب زي الورد يشتغلوا ويحبوا شغلهم
عامر : الله يكثر من امثاله ..
سامي: انت ايش رايك في المصنع ؟
عامر : الصراحة المصنع كبير ولازم نعرف … قطع حديثه دخول مشعل
عامر سكت وسامي يقوله كمل كمل اشبك سكت
مشعل يقدم القهوة والموية لسامي ويسأله هذا ولدك يا عّم سامي ؟ ويأشر على عامر
سامي يضحك ويقول : لا يا مشعل هذا المرافق معايا وهوا ان شاءلله زي ولدي
وبعدين تراه متخصص في ادارة الاعمال ومشروعه حق التخرج رهيب
كمل يا عامر ايش كنت بتقول ؟
عامر يخجل من كلام سامي ويستطرد ويقول : لازم نعرف عدد العمال الي في المصنع ونشوف المكاين كم عمرها
لازم نعرف جودتها، و مؤهلات الموظفين عشان نقدر نحكم وندرس الموضوع
سامي : يا مشعل ضروري تعرف الكلام دا وتعطي البيانات كلها لعامر هذا أمر مني
بس ما قلت لي يا مشعل انت آش المسمى الوظيفي حقك؟!
مشعل : مشرف على العمال في المصنع
سامي: طيب كويس ، من بكرة أبغى عامر يشتغل معانا ويكون عيني في المصنع
عامر : بس ياعمي انا ..
سامي : ولا بس ولا حاجة .. 

انتهت الحلقة الرابعة

4 Comments
  1. ĥ.aи.ŢŎmק says

    😉أول رد
    حلو خرجتنا لجو المصنع
    شكله فعلاً فيه تطورات بتصير😊
    يعطيك العافية
    بانتظار الحلقة الجاية
    بس طول شوي بالأحداث
    نبغى 10 مشاهد أو حتى 20😁

    1. قتيبة تركستاني says

      اصبر وشوف الحلقات الجاية

  2. ياسمين says

    مستنين الحلقة الجاية بحماس 😍
    رهيب مستر قتيبة

    1. قتيبة تركستاني says

      شكرا ياسمين

Leave A Reply

Your email address will not be published.