التدوين دليل وجودك في الحياة

صدفة .. الحلقة الثالثة

935

صدفة الحلقة الثالثة

يوم جديد ومنظر للڤيلا الخاصة بسامي وابنته العنود 

وهم جالسين يفطروا .. تجيهم الخدامة على الطاولة :

بابا انا يبغى حول فلوس حق ماما في مانيلا 

العنود : حتى انا بروح البنك اشوف حسابي وقفوه ليش 

سامي : اوكي بس المشكلة عامر مايجي غير بعد الظهر ..

العنود : بعد الظهر متأخر مرة يابابا .. خلاص انا حركب تاكسي واروح مع الشغالة كلها جنب بعض الاماكن 

سامي : تاكسي ايش يا بنتي اصبري شوية يجي الادمي يوصلكم !!

العنود : صدقني لو بعد الظهر حنتأخر ماتعرف كيف النظام هنا حتى البنوك تقفل عشان الصلاة ويتأخروا بعد الصلاة ومدري ايش يعني احسن أروح من بدري أضمن 

سامي : طيب مو مشكلة 

************

في البنك

العنود : لوسمحتي ابغى استفسر عن الحساب موقف مع اني بسحب منه بين فترة وفترة واستخدمته اخر مرة قبل شهر ؟

الموظفة : عزيزتي هذا اسمه تحديث بيانات ولا الحساب مافيه اي مشكلة .. ممكن بياناتك وهويتك ؟

العنود : اتفضلي

الموظفة : خلاص انا حدثت البيانات .. بس نصيحة مني لا تستخدميها في المشتريات وانتي خارج المملكة انا شايفة العمليات عندك 

حاول تختاري عملة البلد الي انتي فيها لما تتسوقي

العنود : اها .. انا قلت يمكن ارخص .. عموما

مشكورة على النصيحة 

********* 


المشهد داخل بيت عامر في المطبخ الصغير 

ام عامر واقفة تقطع الخيار عشان تاكل مع عامر البيض 

فطورهم المعتاد 

عامر يدخل المطبخ ويقول : صباح الخير يا امي 

استريحي الله يخليكي انا اقطع وارتبلك الفطور

 بعدين 

ما تقدري تصبري ١٠ دقايق الين أجيكي ..!!

ام عامر : ياولدي متعودة على كدا ..

 وبعدين انت ما تبغى تاكل من يد امك ولا ايش ..:) 

عامر : لا يا أمي بس انتي تعبانة ولازم ترتاحي زي ماقال الدكتور 

ام عامر : ان شاءلله مافيا شي .. و كلها كم شهر وتجي العروسة تفطر من يدها 

عامر : يادي العروسة الي مستعجلة عليها 

ام عامر : ايش فيها هديل جميلة ماشاءلله وموظفة ومو ناقصها شي وبعدين لا تنسى انها قريبتك وماراح تلاقي احسن منها

عامر : ما اتكلم عنها الله يوفقها .. انا بقولك لسه بدري اصبري يا امي والله يكتب الي فيه الخير 


************

في الصالة الكبيرة سامي يتفرج على الاخبار 

تدخل العنود مع الشغالة 

العنود : والله يابابا الموضوع طلع سهل مجرد تحديث بيانات

والي عجبني انه صار في دقايق 

سامي : عشان تعرفي كيف ان الموضوع سهل ومن ناحية أمنية افضل لك .. 

العنود : الموظفة بنت حلال نبهتني على عملية الشراء تكون بالدولار افضل .. الله يسعدها ..ماهو زي الأمريكان محد حول احد .. نفسي نفسي 

سامي : الناس في السعودية متعاونين والامور البنكية بتتحسن حبة حبة .. يلا متى ترجعي انتي وتستقري وتمسكي شغل ابوكي !؟

العنود : ياربي يابابا الف مرة اقولك انا تخصصي غير عن شغلك في المكتب .. هذي تجارة ولازملها واحد فاهم ودارس في الادارة او حتى في التسويق على الاقل ..ماهو زي انا في التصميم والهندسة

سامي :ماهو شرط تكوني متخصصة عندنا 

اهم شي تعرفي تحسبي وتعرفي تديري المصانع من المكتب

هذا هو الاهم ..

العنود : انا ابغى اشتغل في مجلة او في مكاتب متخصصة الين افتح مكتبي الخاص فيني باذن الله .. 

سامي : ان شاءلله تحققي حلمك .. بس المكتب حقنا مين ينتبه عليه من بعدي ومين يمشي المصانع .. وبعدين انا ما اثق في السكرتير علي ولا في المدير جميل .. لازم احد ثقة يكون موجود ويخاف على الحلال 


العنود : الله يطول في عمرك يابابا بس مين جميل هذا ؟؟ اول مرة اسمع فيه ؟؟

سامي : هذا المدير اللبناني الجديد .. بيكرف ويشتغل ويجيب عائدات مالية جيدة .. وبياخذ راتبه ونسبته ..لكن طبيعي ماراح أسلمه كل الشغل 

العنود : يابابا ياحبيبي أوعدك ازور المكتب والمصانع قبل لا ارجع امريكا ونشوف ايش حيصير بس خليني اتخرج

اول شي .. 


**********

ام عامر وهيا تلبس العباية تنادي عامر في غرفته :

هيا لا نتأخر ياولدي يادوب تلحق على شغلك 

يخرج عامر من غرفته ويقول : لا اليوم ماعندي شغل الراجل قال حيكلمني لو يحتاجني

ام عامر اها طيب كويس .. يصير نشرب الشاي كلنا مع خالتك

عامر : طيب يا امي 

***********

بيت خالة عامر متوسط الحجم شقة عادية زي شقة اختها 

ام عامر تدق الباب ويفتح لها الباب زوج أختها فيصل :

اهلا اهلا ام عامر اهلا عامر اتفضلوا اتفضلوا

عامر بكل هدوء اهلا فيك عمي 

غرفة الرجال مكركبة وحوسة فيها اوراق وكتب وشنط سفر  

يزحفها برجوله فيصل ويفضي مساحة لشخصين ويقول :

اتفضل ياعامر اتفضل معليش على الحوسة

عامر : لا عادي ياعمي ماشاءلله انتو ناقلين ؟

فيصل : لا ياولدي انا اتضاربت مع خالتك وبشيل عفشي واخرج 

عامر : استهدي بالله ياعم انتو ناس كبار وعندكم اولاد 

فيصل : والأولاد صاروا كبار خلاص ياعامر والواحد لازم يشوف حياتو .. والحياة ماصارت تنطاق مع هدي الادمية 

عامر : الله ييسر الحال ويهدي بالكم 

فيصل : يلا انا اسيبك كنت خارج من البيت نشوفك مرة ثانية

سلام 

عامر : يا امي .. يا ام عامر 

ام عامر : تعال تعال ياولدي مافي احد ..

يدخل الصالة العادية حقت البيت يلاقي خالته تبكي وامه تواسيها .. ام عامر تقول لولدها مافيها شي خالتك بس مصدعة شوية 

عامر : يا امي فيصل قلي كل شي وبعدين نحن مو صغار 

خلاص صرنا نفهم .. اشبك ياخالتي ايش فيه !! ضربك ولا بس صرخ عليكي !! 

خالة عامر : ولا ضربني ولا صرخ عليا بس كان يبغى فلوس وانا ماعندي اعطيه الفلوس حقت الاولاد 

عامر: لا حول ولا قوة إلا بالله ، طيب من متى ، وأنتم على هذا الحال؟! 

الخالة: من يوم ما فصلوه من العمل ، و هو بيهرب من الواقع وبيتعاطي الهباب حقه …(تبكي بحرقه) 

عامر: طيب يا خاله ، اولادك يدروا ؟! 

الخاله: لا طبعاً ، بس ملاحظين تغيير ، و بحاول اخليهم ما يعرفوا

عامر: طيب آش الي مصبرك هذا كله ؟! 

الخالة: يا ولدي الزواج فيه حلوه و مُره ، وانا عشت معاه الحلو ، لو ما حصبر على مُره ،

 ليه رضيت أشاركه من أولها ، و أنا ادعي ربي يهديه للحق و يبعده عن كل شر

عامر: معقول بعد هذا كله تدعيله كمان؟! 

الخالة: طبعاً .. ياولدي العشره ما تهون إلا على … وانت فاهم .. قاطعهم صوت جرس الباب

عامر قام وفتح الباب هديل رجعت من العمل 

هديل باستغراب : عامر !؟ .. 


انتهت الحلقة الثالثة 

10 Comments
  1. ام فارس says

    ينفع مسلسل محلي بامتياز يفقع المرارة بس بتابعو ليش ما انت عارف..كانو عقاب
    عالعموم بالتوفيق

    1. قتيبة تركستاني says

      شكرًا لقرائتك الأجزاء الثلاثة .. انتظري القادم المثير 🙂

  2. Walaa says

    ما شاء الله عليك مبدع انا ما احب اقرا و انجذب للقصة

    1. قتيبة تركستاني says

      .. انتظري القادم المشوق .. شكرًا ولاء

  3. Abdurrahim oğuz says

    ماشاء الله يا أ.قتيبة قصة رائعة ومنتظرين الباقي بولهة واستمر للأمام.
    متى راح تنزل القصة الجاية ؟

    1. قتيبة تركستاني says

      اهلًا عبدالرحمن ..اشترك بايميلك في المدونة من المربع أسفل الصفحة وراح تجيك الحلقة الجاية أول واحد 🙂

  4. yahya_moallim says

    استمر أستاذي 😃

    1. قتيبة تركستاني says

      اهلًا يحيى اشترك في المدونة بايميلك وتجيك اخر التحديثات

  5. ĥ.aи.ŢŎmק says

    لا لا لا لا 😞😞😞
    لا تقول عامر بيحب هديل😒
    عامر لازم يتزوج العنود ويعيش العز ويسافر😋😋

    1. قتيبة تركستاني says

      خلينا نصبر ونشوف ايش حيصير في الأجزاء الجاية .. اشترك في الصندوق حق البريد تحت وراح تعرف التفاصيل اول بأول

Leave A Reply

Your email address will not be published.