التدوين دليل وجودك في الحياة

صدفة .. الحلقة الثانية

802

صدفة الحلقة الثانية 

العنود وعامر والعم سامي في السيارة

 العم سامي يقول لعامر .. أبغاك تروح حي الشاطيء

هناك بيت صحبات العنود نوصلها اول شيء .. 

عامر يرد بكل هدوء .. حاضر 

الجو هدوء وسكوت في السيارة 

العنود طفشت تقول ايش الطفش والملل الي انتو فيه 

ارفعوا لنا الراديو ولاخلونا نسمع اي شيء 

العم سامي يجاوبها : يابنتي اهمدي الدنيا حر خلي الآدمي يركز في الطريق

ولم نقرب صحصحي عشان توصفيلو

طالع العم سامي في طبلون السيارة والكرسي والأرضية وقال لعامر

ماشاءلله السيارة نظيفة يا عامر انت تنظفها بنفسك ولا المكتب ينظفها لك؟

عامر جاوبه بكل هدوء لا أنا أنظفها يا عمي .. لانها سيارتي وانا بس متعاون مع المكتب

وبعدين ما أحب احد ينظف سيارتي وأحب اعتمد على نفسي .. 

العم سامي يقول بإعجاب يعجبني الشاب الي يهتم في اغراضه ويحب يهتم فيها 
انت كم لك تشتغل في الشغلانة دي ؟

بعد ما تخرجت من الجامعة يعني من ٦ شهور تقريبا

وأبوك يصرف عليك ولا انت بنفسك ؟ 

الوالد متوفي وانا وحيد أمي والحمدلله مستورة   

العنود تتدخل وتقول : يابابا عيب الأسئلة هدي خصوصية للادمي ؟ 

يلتفت العم سامي للعنود ورى ويقولها : خصوصية هدي عندكم في امريكا .. هنا عادي جدا ندردش ونتعرف على الناس .. 

على العموم الله يرحم ابوك ياعامر ويحفظلك أمك 

عامر بكل هدوء تسلم .. يرجع الهدوء والسكوت في السيارة من جديد 

بعد شوية تلتفت العنود لعامر وبصوت حزين 

ايوة لو سمحت خش من عند الصيدلية هناك يمين وبعدها تلاقي البيت على اليسار 

تسلم خلاص أنا حكلمك يابابا لما اخلص سلام 

*****

دخل وقت المغرب ومشي عامر من قدام بيت صحبات العنود 
وسال سامي : على فين تبغاني اروح الان ياعم ؟ 

سامي : اتجه على المكتب حقي اذا سمحت 


لما وصلوا المكتب سامي قال لعامر اطلع فوق معايا 

عامر رد بأدب أنا أبغى أصلي المغرب وبعدها امشي شوية في البرحة الي ورى

لان اليوم ما مشيت في الصباح

طيب الله يتقبل لما تخلص اطلعلي المكتب .. 

عامر يرد بكل هدوء : حاضر ياعم


وسط المشي يتصل عامر بأمه كيف حالك ايش مسوية !! آوه ماشاءلله جات خالتي طيب سلمي عليها

أنا الان عند مكتب العم سامي اذا احتجتي شي كلميني سلام 

*****

طلع المكتب عامر ودخل عند العم سامي 

سأله .. خلاص مشيت ؟؟ 

جاوبه عامر بكل هدوء ايوة ياعم الحمدلله رياضة المشي مريحة بالنسبالي كثير 

والله ياعامر نفسي امشي بس زي منت شايف ماعندي وقت 

ولا شوف الكرشة كيف 

عامر بابتسامة : طيب حاول تمشي معايا يوم تكون فاضي ياعم 

العم سامي بإعجاب : فكرة والله ياولدي .. 

يتمتم عامر في نفسه ويقول الله يرحمك يابوية 


يرن جوال العم سامي اتصال من بنته العنود 

هلا بنتي .. طيب نحن خلصنا وطالعين من المكتب.. طيب أوكي باي 


البنت هدي متعبتني يا عامر ولسه ماني عارف كيف أقولها المشكلة 

الي جاتنا من امريكا .. ايش تبغاني أسوي؟؟  

عامر : .. أرجوك يا عّم لا تدخلني في الأمور العائلية .. الله يوفقها يارب 

سامي يرفع سماعة المكتب : ياعلي تعال 

علي : هلا استاذ سامي 

سامي : خليك الين الساعة ١٠ وانتبه لو جات اتصالات او ايميلات تبلغني 

علي : أبشر يا استاذ 

علي يطالع في عامر باستغراب ويسأل نفسه مين هذا وليش داخل هنا ؟؟

سامي : يلا ياعامر خلينا ننزل نعدي على العنود 

سلام يا علي .. سلام 

***** 

في السيارة راجعين على البيت سامي والعنود وعامر 

عارفه يا العنود إنّو السفارة الامريكية اتصلت عليا ورحتلهم أمس 

العنود باستغراب .. السفارة ؟؟ ليش ؟؟ خير ايش يبغوا كمان ؟؟

طيب لما نرجع البيت نتكلم في الموضوع يابابا ما ينفع هنا في السيارة لوسمحت 


نزلت العنود معصبة من السيارة قفلت الباب بقوة وخرجت

سامي : تسلم يا عامر بكرة حكلمك لو احتجتك بس غالبا ما حروح المكتب 

بعد الظهر أكلمك سلام .. سلام ياعم سامي 


***** 

رجع عامر على شقتهم البسيطة

صالة لون واحد جالس فيه أمه وخالته

دخل وسلم عليهم : 

كيفكم طيبين كيف صحتك الان يا أمي .. ؟؟

ام عامر : الحمدلله يا ولدي انت كيفك وكيف الشغل الجديد معاك ؟ 

عامر : الحمدلله الناس كويسة وفيه مرونة في الآوقات ولسه دوبي بدأت معاهم ان شاءلله خير 

يصب قهوة لنفسه من الدلة الموجودة في الطاولة 

ويسأل أمه : مًاتبغي يا أمي تسافري معايا نغير جو شوية ؟؟ 

خالة عامر : ايوة ياعامر خد أمك واخرجوا شوية تغيروا جو

ام عامر : يلا على يدك ياولدي انت خذ اجازة وانا جاهزة يصير خالتك تجي معانا كمان 

خالة عامر : ولا أجي ولا اروح أنا عندي أولادي ومشغولة بيهم 

بس خدو معاكم هديل بنتي فاضية ماعندها شي وتسليكم وتنتبه عليكي يا أختي ؟

برضو فكرة حنشوف كيف نرتبها مع عامر …. 

 

******

في نفس الوقت صالة كبيرة في بيت سامي تلفزيون شغال هناك على قناة العربية مجلس فخم يخفض صوت الاخبار ويصرخ : وليش ما قلتيلي ان الملحقية كلمتك ونبهتك بالموضوع ؟

العنود : يابابا ما كنت أتوقع يطلعوا قرار زي كدا ؟ لان القرار يطبق على ناس وناس واصلا القرار جا قبل ما ارجع بيوم ؟؟

سامي : اهم شيء انه صار والآن حيوقفوا البعثة عنك لو ما رجع معاكي محرم .. !! 

العنود : طيب انا جاتني فكرة ايش رايك تجي معايا على امريكا تقعد ٣ شهور وترجع السعودية تاني .. 

سامي : صعبة اسيب الشركة هذي الفترة لكن حشوف كيف الأوضاع وبعدين لِسَّه عندنا وقت قبل لاترجعي امريكا 

العنود : بعدين يابابا لاتفتح مواضيع زي كدا قدام احد غريب لوسمحت 

 سامي : الولد عارف كل شي وهوا راح معايا السفارة  
العنود : يووووه ما تبات في فمك فولة.. 

*****


خرجت الخالة من بيت ام عامر وعامر بكل هدوء يصارح أمه يا امي أنا أبغى اسافر معاكي ليش هديل تجي معانا ؟؟

ام عامر : ياولدي ماتعرف خالتك كيف تحب احد يكون معايا 

عامر : صح كلامها بس أنا هذي المرة حكون معاكي

ام عامر : ياولدي مو مشكلة أهو منها تتعرف على هديل وتشوف اذا تناسبك عشان نخطبلك هيا ؟

عامر : نخطبلك !! دحين مخططين من اول ومتفقين عليا .. بابتسامة هادئة عامر يقول : الله يسعدك يا أمي 

أنا الزواج شايله من راسي هذي الفترة .. خليني استقر في الوظيفة وأجمع فلوس وبعدين ربنا يسهلها 

ام عامر : ياولدي أبغى ازوجك وافرح فيك انت الي باقيلي في الدنيا 

عامر : ان شاءلله تفرحي وتشوفي أحفادك بس الصبر حلو يا أمي

عامر يستعد للنوم والغرفة ظلام ويقلب تويتر 

ماعنده متابعين ولا يغرد بس يتابع ويقرأ وفجأة مر على هاشتاق #غلاء_المهور 

ابتسم وقلب جسمه على اليمين ونام ..  

انتهت الحلقة الثانية 

2 Comments
  1. ĥ.aи.ŢŎmק says

    جميل 😊😊
    نزلتها اليوم😏
    يالله نبدأ نكمل
    متحمسة لللأحداث 😋😋
    شكراً لك

    1. قتيبة تركستاني says

      شكراً الحلقة الثالثة نزلت 🙂

Leave A Reply

Your email address will not be published.