التدوين دليل وجودك في الحياة

صدفة .. الحلقة الأولى

515

عامر شاب سعودي حصل على شهادة بكالريوس في ادارة الاعمال  مالقى وظيفة تناسبه اشتغل في محل لتأجير سيارات يسوق بالزبائن المحتاجين سيارة وسواق 

بدأ بالتعامل مع الوفود والاجانب وبدأ تعلم الإنجليزي منهم وصار يعتمد عليه بشكل كبير راعي المحل 

.. 

راعي المحل الي شغال عنده عامر عنده صديق اسمه سامي رجل اعمال وكبير في السن

ماعنده اولاد يخدموه وسواقه سافر 

كلم راعي المحل لانه احتاج لسواق يخدمه الين يرجع سواقه  

ارسله عامر لانه شاب لبق ونشيط ويحب عمله 


راح عامر ثاني يوم من الصباح لبيت سامي في الوقت ولما ركب سامي قله

صباح الخير

رد عليه عامر صباح النور

سامي : ماشاءلله انت سعودي وجاي على الوقت 

عامر : ياعم سامي الشغل مو عيب وبالنسبة للوقت هذا شغلي واهم شي فيه الوقت !!

سامي ضحك في نفسه واستعجب من عامر لما قاله العم سامي لانه اول مرة يسمعها 

طول الطريق وسامي ما سأل عامر أي سؤال ولا عامر سأل سامي أي سؤال ..

 وصل المكتب وقله شكرًا يا عامر حكلمك قبل لا اخرج بنص ساعة 


راح عامر لبوفيه يفطر فيها وكأنه متضايق او جاه شعور غريب جديد

اول مرة يشتغل مع شخص سعودي .. !! 


خلص عامر الفطور وراح اقرب ممشى وغير جزمته ونزل يمشي كعادته اليومية 

يمشي حاله حال نفسه لايطالع يمين او يسار ولا يفكر في أحد غير أمه الوحيدة

قاعدة لوحدها في البيت بعد ما توفى ابوه وتركلهم البيت وراتب التقاعد 

طلع سامي لمكتبه وفتحله رجل الأمن الباب وقله : صباح الخير استاذ سامي 

فيه ظرف وصل من أمس في الليل والسكرتير علي الى الان ما جا احطها في مكتبه

 ولا تأخذها تقرأها .. 

سامي : ظرف ايش ؟ 

رجل الأمن : ما اعرف جا واحد أمس وأعطاني الظرف 

سامي : هيا بركة انك تنام هنا في المبنى ، لما يجي علي خليه يجيني المكتب لوسمحت 

 

خلص عامر المشي وصلى الظهر وخرج من المسجد لقى مكالمة فائتة

عامر : أهلين عّم سامي ، طيب الان حاجيك ..


ألو عّم سامي أنا وصلت تحت .. ايش !! اطلع !! طيب الدور الكم ؟ أوكي ..

عامر : هلا عّم سامي أمرني 

-تعال هنا يا عامر انت تعرف تقرأ إنجليزي ؟ 

عامر : ايوة اعرف .. شوية يعني ..

سامي : طيب اقرأ ايش تفهم من هذا الخطاب 

عامر : امّممم يحتاجوك في السفارة الامريكية عشان بنتك عندها مشكلة في أمريكا 

ما اعرف كدا فهمت ؟؟ اذا معليش اسأل يا عّم سامي انت ما عندك سكرتير ؟

سامي : الا موجود بس مهمل و الأخ يتأخر حضرتو ولما اخصم منو يقعد يبكي

أنا اول ما شفت الخطاب قلت أكلمك عشان نروح نشوف ايش عندهم 

بعدين انت أشبك كدا متشمس وشكلك كنت تجري ولا ايش ؟ 

عامر : لا كنت أمشي دائما قبل الظهر أمشي شوية عادة ما تركتها من زمان 

سامي : اها عشان كدا ما رديت عليا وانت بتمارس عادتك ؟ 

عامر : لا ، كنت بصلي يا عّم وكلمتك بعدها 

سامي : اها .. طيب قوم يالله خلينا نروح نلحق على السفارة نشوف ايش عندهم .. 


خرج العم سامي من السفارة زعلان ما سأله عامر ايش السبب 

وصل البيت وقله بكرة حكلمك ياعامر لو احتجتك

عامر : يعني ما أجيك الصباح ؟

سامي : لأ ، لا تجيني حكلمك بكرة مع السلامة 



في الليل رجعت العنود بنت سامي من امريكا عشان تقعد الاجازة عند اَهلها 

سلمت على ابوها وامها وماتوقعت ردت فعلهم الغريبة او الباردة 

أتعشوا ونامو وعدى اليوم على خير … 


في العصر نزلت العنود على الصالة سلمت على ابوها وامها وقالت لابوها : 

 

العنود : بابا أبغى سيارة توصلني لعند صحباتي والشغالة تقول السواق ماهو في ؟ 

سامي : دحين الناس تقعد شوية مع ابوها وامها ويحكوهم كيف الجامعة والبلد هناك

إنتي على طول تبغي تخرجي عند صحباتك !!

العنود شمقت وبرطمت وماعجبها الكلام 

سامي : السواق رجع بلده يا بنتي لكن مو مشكلة أنا خارج بعد شوية أوصلك معايا 

العنود : توصلني !! كيف !!انت ماتقدر تسوق يابابا ؟؟

سامي : حيكون معايا عامر ، شغال عند عمك ناصر في محل السيارات

وصار يوديني ويجيبني هذا الشهر 

العنود : طيب أنا حقوم البس واتجهز 



العم سامي كلم عامر وقله أحتاجك تجيني الان بروح مشوار 

وصل عامر وركب سامي السيارة 

مشي عامر بالسيارة شوية وقف سامي وقله دقيقة بنتي العنود جاية معايا 

رجع عامر بالسيارة ورى لعند الباب

خرجت العنود وركبت السيارة وأول ما دخلت قالت كنتو حتمشو وتسيبوني … وضحكت 

سامي : هذا عامر يا العنود حيكون معانا لمدة شهر الين يرجع السواق 

وهذي العنود يا عامر تدرس في امريكا جاية أسبوعين وراجعه 

اهلًا وسهلا .. تمتم عامر بكل هدوء .. اهلًا وسهلا 


انتهت الحلقة الاولى  

10 Comments
  1. ○clim (@cc0cca) says

    😪😪 متى تكمل؟

    1. قتيبة تركستاني says

      الاسبوع القادم 🙂

      1. عماد says

        تسلسل جميل
        في انتظار الجزء الثاني

        1. قتيبة تركستاني says

          شكرًا لقرائتك وتعليقك

    2. قتيبة تركستاني says

      قريبا

  2. Afnab says

    رواية؟
    أنا مرة تحمست الصراحة لو كنت ادري ماكان فتحتها إلا بعد ماتكتمل مافيني صبر ابدا😅

    1. قتيبة تركستاني says

      لا ماهي رواية هذي مجرد قصص قبل النوم 🙂
      الصبر حلو

      1. ĥ.aи.ŢŎmק says

        صدق؟ يعني ماهي حقيقة؟😨😨
        وأنا اللي متحمسة😖
        مو مشكلة حتى لو قصة تبقى حلوة
        يعطيك العافية 👍👍

  3. سعد رصاص says

    مشوقه ننتظر التتمه على نار

    1. قتيبة تركستاني says

      نزلت الحلقة الثانية .. شكرًا لمرورك وتعليقك

Leave A Reply

Your email address will not be published.